Хүндэтгэлийн үйл ажиллагаанд Баян-Өндөр, Жаргалант сумын салбар зөвлөлийн гишүүд, төрийн болон төрийн бусад байгууллага, аж ахуйн нэгж байгууллага, бизнес эрхлэгчдийн төлөөлөгч 400 гаруй бүсгүйчүүд оролцсон бөгөөд Хүндэт зочноор УИХ-ын гишүүн Д.Батлут, “Эрдэнэт үйлдвэр” ТӨҮГ-ын Ерөнхий захирал Х.Бадамсүрэн болон албаны хүмүүс оролцлоо.

Орхон аймгийн Эмэгтэйчүүдийн салбар зөвлөлийн дарга Д.Үүрийнтуяа: “Цаг үеийн нөхцөл байдал, бидний амьдрал ахуй, нийгмийн өмнө тулгарч буй гэнэтийн, томоохон сорилтуудыг даван гарахад охид бүсгүйчүүддээ дэм болох зорилгоор хүүхэд эмэгтэйчүүд, тэдний гэр бүлд чиглэсэн чуулган, аян, сайн үйлсийн ажлыг тухай бүр зохион байгуулан ажиллаж ирсэн. Цаашдаа бид охид эмэгтэйчүүд, тэдний гэр бүлийн эрх ашгийг хамгаалах, гэр бүлийн үүрэг хариуцлагыг ухамсарлуулах, тэдний бүх талаар хөгжүүлэх, эмэгтэйчүүдийн хөдөлмөр эрхлэлтийг дэмжих, шийдвэр гаргах төвшинд эмэгтэйчүүдийн оролцоог нэмэгдүүлэх чиглэлээр бодлогын санал санаачлагыг гаргах, хэрэгжилтийг зохион байгуулахад төрийн болон төрийн бус байгууллагуудтайгаа хамтран ажиллахаар төлөвлөж байна. Орхон аймгийн эмэгтэйчүүдийн өмнө тулгамдсан асуудлуудыг шийдвэрлэхэд аймаг орон нутгийн удирдлагууд, төр захиргааны байгууллагууд, үйлдвэр аж ахуйн газрууд, бизнес эрхлэгчдийн оролцоо, дэмжлэг нэн чухал бөгөөд хамгийн гол нь охид бүсгүйчүүдийн чин сэтгэлийн дэмжлэг, хамтын ажиллагаа, харилцан ойлголцол юу юунаас ч илүү чухал”.

Хүндэтгэлийн үеэр ажил үйлс, амжилт бүтээлээрээ хамт олноо манлайлан ажилласан бүсгүйчүүдийг Аймгийн ИТХ болон аймгийн Засаг даргын шагнал, Монголын Эмэгтэйчүүдийн Холбооны “Хүндэт тэмдэг”, Салбар зөвлөлийн нэрэмжит шагналуудыг гардууллаа.

Мөн хүний нөөцийн аудитор Б.Батгэрэл “Монгол хүний язгуур мөн чанар ба эмэгтэйчүүдийн манлайлал” сэдвээр лекц тавилаа. "Чингис хаан" хамтлагийн удирдагч, МУАЖ Д.Жаргалсайхан, Соёл, урлагийн цогцолборын авьяаслаг уран бүтээлчид эмэгтэйчүүддээ хүндэтгэл үзүүлж “Ижий минь та урт наслаарай” хүндэтгэлийн концерт толилууллаа.