Тус уралдааныг Бат-Өлзийн Бат-Эрдэнэ(ББ сан)-ийн дэргэдэх “ГЭРЭЛ АСААЯ” клуб, Даян Дэлхийн ногоон хөгжлийн байгууллага хамтран зохион байгуулж байна. Цахим сүлжээ ашиглан эерэг мэдээлэл түгээх, эх дэлхийгээ хамгаалах, орчны бохирдлыг бууруулах, нийгэмд зөв үлгэр дуурайлал үзүүлэх, байгаль орчноо хайрлан хамгаалахад олон нийтийг уриалах зорилготой.

Уралдаанд ирүүлэх бүтээл нь Цагаан тоос таны амьдралд хэрхэн нөлөөлж байна вэ?, Аялал ба хог хаягдал, Хөрсний бохирдол ба нүхэн жорлон, Ус таны амьдралд ямар үнэ цэнэтэй вэ?, Ой ба амьдрал гэсэн өгөгдсөн 5 сэдвийн хүрээнд хийгдэх юм. Түүнчлэн бүтээлээ туурвихдаа хүний эрх, нэр алдарт халдаагүй, ёс бус хэллэг агуулаагүй, үнэн зөв, бодит баримт, мэдээлэлд тулгуурласан байхыг удирдлагаа болгохыг зөвлөжээ. Мөн видео контентоо гар утас болон камераар бичсэн байж болох ба 1- 3 минутын урттай, дүрсний чанар HD 1280х720–оос доошгүй нарийвчлалтай, mp4 өргөтгөлтэй, зохиогчийн эрхийн зөвшөөрөлтэй ая, дуу ашигласан байх ёстой. Уралдаанд ирүүлэх бүтээлийг 2022 оны 05 дугаар сарын 06-16-ны өдрийн 15:00 цаг хүртэл ББ САН фэйсбүүк хуудсаар хүлээн авах ба ирүүлсэн нийт бүтээлээс тодорхой үзүүлэлтээр шилдэг 20 видео контентыг шалгаруулах юм байна. Шалгарсан бүтээлүүдийг ББ САН фэйсбүүк хуудсанд хуваарийн дагуу, хугацаатай байршуулан нийтийн хүртээл болгоно. Хуваарьт хугацаанд үзэгчдээс авсан бодит сэтгэгдэл, хандалт болон бусад үзүүлэлтээр 5 байр шалгаруулан, өргөмжлөл мөнгөн шагналаар шагнан урамшуулах ажээ. Гурван сая зургаан зуун мянган төгрөгийн шагналын сантай энэхүү уралдаанд өөрийн авьяас чадвар, уран сэтгэмжээ сорин, олон нийтэд эх орон байгаль дэлхийгээ хайрлан хамгаалах эерэг давлагааг бий болгох боломж зөвхөн ЭРДЭНЭТИЙНХЭНД байгаа нь гайхалтай.