Бат-Өлзийн Бат-Эрдэнэ(ББ) сан, "Илтгэх Индрийн Ирээдүй" ТББ, "Гэрэл асаая" клуб хамтран “SUMMER CAMP-2022” үйл ажиллагааг энэ сарын 25, 26-нд “ЭРДЭНЭТ СПОРТ, АМРАЛТЫН ХҮРЭЭЛЭН”буюу бидний хэлж заншсанаар НААДМЫН ТАЛБАЙД зохион байгууллаа. Тус үйл ажиллагаанд Эрдэнэт хотын оюунлаг 1000 орчим залуус оролцож, хоёр өдрийн турш хамтдаа хувь хүний хөгжлийн сургалтад хамрагдан, харилцан суралцаж, багаар ажиллаж, өрсөлдөж, дуулж бүжиглэн завгүй өнгөрүүллээ. Өөрийгөө хөгжүүлэх, өөртөө өөрчлөлт хийх хүсэлтэй хүн бүрт нээлттэй бүртгэл явуулж, салбар бүрийн 15-75 насны төлөөллүүд оролцлоо. “Summer camp-2022” үйл ажиллагааны үндсэн багшаар “Илтгэх индрийн ирээдүй” ТББ-ын багш Д.Хүрэлбаатар болон Гэрэл асаая 1, 2 хөтөлбөрийн сургагч багш нар ажилласан юм. Мөн зочин илтгэгчдээр загвар өмсөгч ТОП МОДЕЛЬ Э.Энхболд, УДЭТ-ын жүжигчин, Монгол улсын СТА Н.Баярмаа, “Бумбардай” төслийн санаачлагч, комикс зохиогч, МУ-ын Соёлын элч, “International Manga Awards” тэргүүн байрын шагналт, “Эконтэ” ХХК-ийн захирал Н.Эрдэнэбаяр, “Эконтэ” ХХК-ийн хамтран үүсгэн байгуулагч, Ерөнхий продюсер Э.Тамир нар оролцож, халуун дотно, хайр дүүрэн яриа өрнүүлсэн. Хоёр өдрийн үйл ажиллагааны төгсгөлд рок попын хамтлаг дуучдын шоу тоглолт зохион байгуулагдаж, урилгаар ТАТАР, НИСВАНИС, MADNESS, ГУРВАН БҮДҮҮН зэрэг хамтлаг дуучид ая дуугаа өргөж DJ Don Turito, DJ ANNA нар доргио үдшийг бэлэглэсэн юм. Харин хөтлөгчөөр Х-Түц продакшны залуу жүжигчин С.Батзориг ажиллалаа.