Монголын адуучдын холбооноос 21 аймгийн аварга шалгаруулах "Адуучин 2022" тэмцээнийг зохион байгуулсан бөгөөд найм дахь аймаг болох Орхон аймагт аймгийн аварга шалгаруулах “АДУУЧИН 2022” тэмцээн зохион байгууллаа. Тэмцээний зорилго нь ёс заншлаа хадгалан хамгаалж, хөгжүүлэх, Монгол хүний хайрладаг молор эрдэнэ морио зөв хайрлан хамгаалах, эртнээс уламжлан ирсэн уг тэмцээнийг өргөжүүлэн хөгжүүлэх, адуучин залуусынхаа авхаалж самбааг шалгах , уран уургач, бугуйлчдынхаа ур ухааныг залуустаа өвлүүлэн үлдээхэд оршиж байгаа юм. Орхон аймгийн аварга шалгаруулах “Адуучин 2022” тэмцээнд Баян-Өндөр, Жаргалант сумын 18 адуучин залуус уурга шүүрэх, явган уургалах, морьтой уургалах, эмнэг булгиулах зэрэг дөрвөн төрөлд хурд хүч, авхаалж самбаагаа сорин өрсөлдлөө.  Тэмцээний аваргаар Баян-Өндөр сумын адуучин Э.Алтанхундага шалгарч Д.Пүрэвдаш, н.Гомбосүрэн нар удааллаа. Аймгийн аваргаар шалгарсан шилдэг адуучин Улсын аварга шалгаруулах тэмцээнд оролцох юм.