Засгийн газрын тогтоолоор дөрвөн жилд нэг удаа зохион байгуулдаг Монголын бүх ард түмний спортын өвлийн XIV наадам, Монголын хүүхдийн спортын өвлийн VII наадам Нөхөрлөл-Тэмүүлэл-Амжилт уриан дор Орхон аймаг, Эрдэнэт хотод эхэлсэн.

Насанд хүрэгчид болон өсвөр насны ангиллаар фрийстайл, параллель слалом төрлөөр явагдаж байна. Тэмцээнд Орхон, Төв, нийслэлийн Баянгол, Баянзүрх зэрэг дүүргээс 40 орчим тамирчин оролцож байна. Тодруулбал, зургаан төрөлд нийслэлийн 7 дүүрэг, 12 аймгаас 244 тамирчин 17 дасгалжуулагч, Монголын хүүхдийн спортын өвлийн VII наадам 417 тамирчин 24 дасгалжуулагч 526 багц медалийн төлөө хурд, хүч, авхаалж самбаагаа сорьж өрсөлдөхөөр мандатаа аваад байна. Снөүбоардын төрлөөр эхэлсэн Өвлийн спортын XVI наадмын улсын аваргууд тодорлоо. Насанд хүрэгчид болон өсвөр нас, 14 хүртэлх гэсэн гурван насны ангиллаар фрийстайл, параллель слалом эмэгтэй, эрэгтэй төрлөөр нийслэлийн Хан-Уул, Багануур, Баянзүрх, Төв, Орхон зэрэг аймаг дүүргийн 40 тамирчин хурд хүч авхаалж самбаагаа сорив. Шагналыг Биеийн тамир, спортын улсын хорооны Спортын бодлогын хэрэгжилтийн хэлтсийн дарга Б.Нямсүрэн, аймгийн Биеийн тамир, спортын газрын дарга Д.Дэлгэрбаяр, "Эрдэнэт үйлдвэр" ТӨҮГ-ын Спорт цогцолборын захирал Ш.Даваахүү болон бусад албаны хүмүүс гардуулав. Тэмцээний шүүгч Монголын снөүбоардын холбооны удирдах зөвлөлийн гишүүн Ж.Отгонбор “Сүүлийн жилүүдэд снөүбоардаар хичээллэгсдийн сонирхол ихээхэн нэмэгдсэн. Улаанбаатар хотод скай ресорт цанын бааз дээр тамирчид маань бэлтгэл сургуулилтаа хийдэг. Өөр газар, өөр зам дээр үзүүлбэр үзүүлж, өрсөлдөнө гэдэг тамирчдын хувьд их сонирхолтой байна. Орхон аймагт снөүбоардын спорт хөгжих боломж дүүрэн байна” гэсэн. Монголын хүүхдийн спортын өвлийн VII наадмын 14 хүртэлх насны параллель слалом эрэгтэй төрөлд Төв аймгаас оролцсон 7 настай Т.Ирмүүн тэргүүн байр эзэллээ. Түүний хувьд снөүбоардаар гурван жил хичээллэж байгаа, хамгийн бяцхан тамирчин байлаа. Мөн параллель слалом, фристайл эмэгтэй хоёр төрөлд Баянгол дүүргийн тамирчин 13 настай М.Есүй тэргүүн байр эзэлсэн. Түүний хувьд снөүбоардаар дөрөв дэх жилдээ хичээллэж байгаа бөгөөд 2021 оны улирлын нээлтийн тэмцээний мөнгөн медаль, 2021-2022 оны УАШ тэмцээний алтан медаль, 2022-2023 оны улирлын нээлтийн тэмцээний алтан медаль, 2023 оны клубуудын аваргын алтан медальт тамирчин юм.

Монголын бүх ард түмний спортын өвлийн XVI наадам снөүбоардын насанд хүрэгчдийн эрэгтэй төрөлд Улаанбаатар хотоос оролцсон Монгол Улсын долоон удаагийн аварга Б.Дамдиндорж тэргүүн байр эзэллээ. Тамирчид зохион байгуулалт, зам талбайн дэд бүтцийн талаар сэтгэл хангалуун байгаагаа илэрхийлэв.

Эх сурвалж: Орхон аймгийн ЗДТГ-ын Мэдээллийн алба