“Эрдэнэтийн дулааны цахилгаан станц”  ТӨХК  гурав хоногийн хугацаанд станцын бүрэн зогсолт хийгээд байна. Тодруулбал,  энэ сарын 20-ны өдрийн 08:00 цагаас 23-ны  08:00 цаг хүртэл бүрэн зогсолт хийж, хэрэглэгчдийг халуун усаар хангахгүй байхыг мэдэгдсэн. 

     Энэ талаар тус станцын Ерөнхий инженер Б.Сурмаахорол “Жил бүр станц бүрэн зогсолт хийдэг уламжлалтай. Энэхүү  төлөвлөгөөт ажлаар станцын техник тоног төхөөрөмжийг задалж цэвэрлэгээ үйлчилгээ, чангалгаа, хэмжилт, тохируулга зэргийг хийдэг. Энэ жил 206 ажлын төлөвлөгөөг гаргаж, гурав хоногт багтаахаар ажиллаж байна.    

Өчигдрийн байдлаар төлөвлөсөн ажлынхаа 50 хувийг гүйцэтгэсэн. Өнөөдөр 80 хувийг гүйцэтгэнэ гэсэн төлөвлөгөөтэй байна.  Энэ сарын 23-ны 08:00-10:00 цагийн хооронд хэрэглэгчдийг  хэрэглээний халуун усаар хангана” гэлээ. 

Турбин цехийн засварын инженер З.Еркебулан “Станцын бүрэн зогсолтын хүрээнд батлагдсан төлөвлөгөөний дагуу  манай цех засвар үйлчилгээгээ хийж байна.  Манай турбин цехийн онцлог зуухнаас ирж байгаа уураар цахилгаан, дулааны эрчим хүч үйлдвэрлэж, Эрдэнэтийн хэрэглэгчдийг дулаанаар хангадаг.  50 хүний бүрэлдэхүүнтэйгээр засвар, үйлчилгээний ажлаа гүйцэтгэж байна” гэлээ.   Станцын их засвар, үйлчилгээг 206 ажилтан 50 бригадад  хуваарилагдан гүйцэтгэж байна. 

Орхон аймгийн ЗДТГ-ын Мэдээллийн төв