Цаг уурын байгууллагын гаргасан 10-12 дугаар сарын цаг агаарын ерөнхий төлөвөөр ирэх саруудад нутгийн зарим хэсгээр олон жилийн дунджаас дулаан, хүйтэн болон хур тунадас ихтэй байх төлөвтэй байна.

Аравдугаар сард баруун аймгуудын нутгаар агаарын температур олон жилийн дунджаас дулаан, харин Хөвсгөл, Архангай, Булган, Сэлэнгэ, Завханы зүүн хэсэг болон Төв, Хэнтийн зарим нутгаар хур тунадас ахиу орох төлөвтэй.

Арваннэгдүгээр сард Булган, Сэлэнгэ, Төв, Хэнтий, Дорнод, Хөвсгөл, Архангайн зүүн болон Сүхбаатарын хойд хэсгээр олон жилийн дунджаас хүйтэн байх төлөвтэй байна. Харин Өмнөговь, Дорноговь, Баянхонгор, Дундговь, Сүхбаатарын өмнөд хэсгээр хур тунадас ахиу орох төлөв ажиглагджээ.

Арванхоёрдугаар сард баруун болон төвийн зарим нутгаар олон жилийн дунджаас дулаан, бусад нутгаар дунджийн орчим байх төлөвтэй байгаа бол Өмнөговь, Дорноговийн ихэнх, Баянхонгорын өмнөд хэсгээр хур тунадас ахиу орох төлөвтэй байна.

Цаг уурын байгууллагаас зуны улиралд хуурай, гандуу байсан, бэлчээрийн даац муу болон хадлан тэжээлийн нөөц багатай нутгийн иргэд, малчдад өвөлжилтийн бэлтгэлээ эртнээс хангаж, малын тэжээл, өвс хадлангаа нөөцлөхийг зөвлөж байна.