Орхон аймаг дахь Цагдаагийн газар, Дотоодын цэргийн байгууллагын 2022 оны үйл ажиллагааны тайлангийн хурал өнөөдөр болж, энэ оны ажлаа дүгнэлээ. Мөн амжилттай ажилласан албан хаагчдаа алдаршууллаа. 2022 онд Цагдаагийн газарт орон нутгийн төсвөөс туулах чадвар сайтай автомашин, дөрвөн дугуйт, мотоцикл, согтуурал тандагч багаж зэрэг 151 орчим сая төгрөгийн хөрөнгө оруулалт хийсэн бөгөөд Цагдаагийн газрын барилгын сантехникийн засвар, дотоод сүлжээний тоног төхөөрөмж шинэчлэхэд 170 орчим сая төгрөгийн санхүүжилтийг шийдсэн билээ. Аймгийн ИТХ-ын хуралдаанаар гэмт хэрэг, зөрчлөөс урьдчилан сэргийлэх, нийтийн хэв журам сахиулах үүрэг бүхий олон нийтийн цагдаагийн орон тоог 40, цалинг 850 000 төгрөг болгон нэмэгдүүлж орон нутгийн төсөвт тусган батлаад байна.