“БИД МОНГОЛДОО ХАЙРТАЙ” ӨГЛӨӨЛӨГ ЗОХИОН БАЙГУУЛЛАА

Орхон аймгийн 9 дүгээр цэцэрлэгийн бяцхан хүүхдүүд Монголын түүх, өв соёл, үндэсний уламжлалаараа бахархсан өглөөг хамтдаа өнгөрүүллээ.

Их эзэн Чингис хааны мэндэлсэн өдөр, Монгол бахархлын өдрийг угтан Орхон аймгийн 9 дүгээр цэцэрлэгээс “Бид монголдоо хайртай” сэдэвт өглөөлөг зохион байгууллаа.

Тус үйл ажиллагаа нь хүүхэд багачууддаа Монголын түүх, өв соёл, үндэсний уламжлал, ёс заншлыг таниулах, эх орноороо бахархах үзэл төлөвшүүлэх зорилготой юм.

Өглөөлөгийн хүрээнд хүүхдүүд Их эзэн Чингис хааны түүх, алдар гавьяатай танилцаж, монгол ардын дуу, хөгжим, бүжгээр ая дуугаа өргөн, үндэсний хувцас, өв соёлоо сурталчилжээ. Мөн монгол ёс заншил, уламжлалаа танин мэдэх олон талт үйл ажиллагаанд оролцсон байна.

Үндэсний дээл хувцсаараа гоёж, авьяас билгээ толилуулсан бяцхан үрсийн баяр хөөрөөр дүүрэн энэ өглөө Монгол өв соёлоо хайрлан хамгаалж, түүх уламжлалаараа бахархдаг ирээдүйн иргэдийг төлөвшүүлэхийн үнэ цэнийг харууллаа.

Монгол өв соёлоо мэддэг, эх орноо хайрладаг хүүхэд — Монголын ирээдүй.